Наталля Качанава правяла рабочую нараду па незавершанай будоўлі ў сталіцы

Старшыня Савета Рэспублікі, Упаўнаважаная Прэзідэнта па горадзе Мінску ўзняла актуальныя пытанні перад кіраўніцтвам сталіцы, кантралюючымі органамі, якія хвалююць многіх мінчан, якія датычацца даўгабудаў. Былі разгледжаны пытанні, што датычыліся мер, прымаемых Мінгарвыканкамам па аб’ектах незавершанага будаўніцтва, у тым ліку тых, што знаходзяцца на кантролі кіраўніка дзяржавы.

Удзел у сённяшняй нарадзе прынялі старшыня Мінгарвыканкама Уладзімір Кухараў, старшыня Дзяржкантролю Васіль Герасімаў, старшыня Пастаяннай камісіі Савета Рэспублікі па рэгіянальнай палітыцы і мясцовым самакіраванні Міхаіл Русы і іншыя зацікаўленыя. 

— Сёння мы праводзім нараду па аб’ектах незавершанага будаўніцтва ў Мінску, — звярнулася да ўдзельнікаў нарады Наталля Качанава .

— У горадзе ёсць шэраг аб’ектаў, якія доўгі час знаходзяцца ў стадыі будаўніцтва, дзесьці не вырашаюцца пытанні, якія трэба было б ужо вырашаць.

Яна пагадзілася, што ў сталіцы шмат ужо зроблена: праведзена інвентарызацыя аб’ектаў незавершанага будаўніцтва, усе яны знаходзяцца на кантролі ў Мінскім гарвыканкаме. Аднак даўгабуды яшчэ ёсць і яны не ўпрыгожваюць Мінск.

— Магчыма, трэба прымаць рашэнні, якія б дазволілі вырашаць пытанні ў кароткія тэрміны. Магчыма, мы выйдзем на рашэнні, якія дазволяць нам, як заканадаўчай уладзе, вырашаць іх у рамках заканадаўства. Можа, трэба нешта змяняць і ўнесці прапановы ў заканадаўства, каб вырашаць гэтыя пытанні больш аператыўна, — абазначыла яна акцэнты сённяшняй нарады. 

Як патлумачыў старшыня Мінгарвыканкама Уладзімір Кухараў, тлумачачы ход рэалізацыі інвестпраекта па будаўніцтве шматфункцыянальнага гасцінічна-дзелавога комплексу на перакрыжаванні праспекта Незалежнасці і вуліцы Каліноўскага, зараз кампанія-забудоўшчык «Скі-будінвест» выйшла на пляцоўку і з 20 снежня распачала першапачатковыя работы. Кіраўніцтва кампаніі вырашае пытанне па далейшым фінансаванні аб’екта. Дарэчы, тэрміны здачы гэтага комплексу вызначаны канцом бягучага года. 

Акрамя таго, у цэнтры ўвагі ўдзельнікаў знаходзіліся пытанні завяршэння будаўніцтва комплексу «Грушаўскі Пасад» на праспекце Дзяржынскага арганізацыяй «Жылбудкамплекст», завяршэння будаўніцтва ўбудаваных і прыбудаваных нежылых памяшканняў і падземнага гаража-стаянкі ў доме № 80 па вуліцы Нёманскай, завяршэння будаўніцтва шматпавярховага жылога дома ЖСПК «Курганная, 35», уводу ў эксплуатацыю і засялення новага дома, які нахіліўся, па вуліцы Купрэвіча, забудовы мікрараёна Сокал для шматдзетных сямей. 

На нарадзе падчас абмеркавання выпрацаваны дадатковыя меры па завяршэнні будаўніцтва гэтых аб’ектаў і паскарэння ўводу іх у эксплуатацыю. 

Таксама быў разгледжаны ход рэалізацыі яшчэ аднаго інвестпраекта, які пакуль марудна рэалізуецца ў сталіцы — будаўніцтва крытага манежу для катання на бегавых лыжах у раёне вуліцы Арлоўскай.